Муҳтарама 12 марта жаҳон чемпиони!

Мамлакатимизда хотин-қизлар спортини ривожлантиришга қаратилаётган доимий эътибор ва ғамхўрлик, истеъдодли спортчилар қўллаб-қувватланаётгани самарасида халқаро спорт майдонларида опа-сингилларимиз эришаётган ютуқлар салмоғи йилдан-йилга ортмоқда.

Грецияда бўлиб ўтган баҳодирлар ўйини мусобақаларида Германия, Польша, Франция, Италия, Россия, АҚШ сингари жаҳоннинг 20 дан ортиқ давлатидан 100 дан ортиқ полвон ғолиблик учун баҳс олиб борди.

Мусобақанинг хотин-қизлар ўртасидаги баҳсларида 60 килограмм вазн тоифасида иштирок этган андижонлик Муҳтарама Алиева 16 килограмм оғирликдаги тошни “узун усул” (ердан елкага, елкадан юқорига, юқоридан елкага ва елкадан ерга)да 10 дақиқа ичида 105 марта кўтариб, энг юқори натижага эришди ва ўн иккинчи бор жаҳон чемпионлигини қўлга киритди.

– Номдор ва кучли спортчилар иштирок этган мусобақада ғолиб бўлиш осон кечгани йўқ албатта, – дейди Муҳтарама. – Жиддий тайёргарлик ҳамда муайян тажриба ва маҳорат менга жуда асқотди. Якунда ғолиб бўлиб, Ўзбекистонимиз байроғини халқаро мусобақада яна бир бор баланд кўтариш шарафига муяссар бўлганимдан хурсандман.