Музаффар оғир атлетикачиларимиз тантанали равишда кутиб олинди ФОТОРЕПОРТАЖ

Грециянинг Ираклион шаҳрида ўтказилган ёшлар ўртасидаги Жаҳон чемпионатида 12 та медал қўлга киритган оғир атлетикачиларимиз тантанали кутиб олинди.

Ярим тун бўлишига қарамай, Ислом Каримов номидаги Тошкент халқаро аэропортида Спортни ривожлантириш вазирининг ўринбосари, Ўзбекистон оғир атлетика федерацияси раисининг биринчи ўринбосари Шахрулло Маҳмудов, ОАВ ходимлари ҳамда спортчиларнинг ота-оналари чемпионларни тантанали равишда кутиб олишди.

Мусобақада дунёнинг 61 та давлатидан жами 304 нафар спортчи ғолиблик учун баҳс олиб боришди. Якуний натижаларга кўра, Ўзбекистон терма жамоаси жами 12 та медалга сазовор бўлди, шундан 5 таси олтин, 5 таси кумуш ва 2 таси бронза медалларидир.

Жаҳон чемпионатида Ўзбекистон шарафини 6 нафар спортчимиз ҳимоя қилди ва улар қуйидаги натижаларни қайд этишди:

Панфилова Жамила (-55 кг вазн тоифасида) – 2 та бронза;

Олимов Ҳожиакбар (-89 кг) – 1 та кумуш;

Жабборова Турсуной (-87 кг) – 3 та олтин;

Амриддинов Шарофиддин (-102 кг) – 2 та олтин, 1та кумуш;

Мирзабоев Мирҳосил (+109 кг) – 3 та кумуш медал.

Маълумот учун, оғир атлетикачиларимиз ёшлар ўртасидаги Жаҳон чемпионатида ўз шахсий рекордларини янгилашга муваффақ бўлишди.

Алимурод МАМАДАМИНОВ, ўз мухбиримиз