Нафиса Мўминовада дуранг, синглисида ғалаба

Мукофот жамғармаси 13 000 АҚШ долларини ташкил қилган ушбу мусобақада 21 мамлакатдан 103 нафар иштирокчи ғолиблик йўлида дона суришди.

Улар орасида опа-сингил гроссмейстерлар - Нафиса Мўминова (2348) ва Гулруҳбегим Тоҳиржонова (2297) ҳам бор эди. Шахматчиларимиз турнирда ўз имкониятларидан бироз паст даражадаги натижани қайд этишди.

Кеча турнирнинг сўнгги 9-партия учрашулари ўтказилди. Мамлакатимизнинг биринчи рақамли аёл шахматчиси Нафиса Мўминова қора доналарда ўйнаб, рейтингда ўзидан юқорида турган хитойлик гроссмейстер Лей Тинг Жиэ билан дурангга эришди.

Гулруҳбегим Тоҳиржонова эса кетма-кет икки мағлубиятдан сўнг ниҳоят ғалаба қозонди. У оқ доналарда ҳаракат қилиб, вьетнамлик рақибини мағлубиятга учрата олди.

Мусобақа якунига кўра Нафиса Мўминова 4,5 очко билан қўшимча кўрсаткичларга кўра 62-ўринни эгаллади. Қирқ тўртинчи поғонадан жой олган шахматчида ҳам 4,5 очко бор. Тоҳиржонова эса 4 очко билан 68-поғонани банд этди. Вьетнамлик гроссмейстер Ле Куанг Лем 7 очко жамғариб, мусобақа ғолибига айланди.