"Насаф" собиқ футболчисини ортга қайтарди

Жамоа таркибида ўзгаришлар мавжуд. Маълумотларга кўра, бугун "аждарлар" яқиндагина "Насаф" билан хайрлашган Сайдулло Раҳматовни яна ортга қайтарди. Орада АГМК билан Туркияда йиғин ўтказиб қайтган чап қанот ҳимоячиси бугун қаршиликлар билан шартнома имзолаган.

Рўзиқул Бердиев чап қанот ҳимояси юзага келган муаммони собиқ футболчиси билан ёпишга уриниб кўрадиган бўлди. Шунингдек, жамоа селекция ишларини давом эттирмоқда. Жамоа бош мураббийи "Ал Файсали"га қарши ўйиндан кейин учта чизиқ бўйича футболчи кераклигини таъкидлаганди.

Чап қанот ҳимоясидан ташқари "Насаф"га яна марказий ярим ҳимоячи ҳамда ҳужумчи зарур. Тез орада бу чизиқлар бўйича ҳам янги футболчилар пайдо бўлиб қолиш эҳтимоли мавжуд.

"Насаф" жамоаси "Персеполис"га қарши ўйинга тараддуд кўриш доирасида 6-7 февраль кунлари Қаршида "Шўртан" ҳамда "Динамо" жамоалари билан назорат учрашуви ўтказиши кўзда тутилган.

Эслатиб ўтамиз, 13 февраль куни "Насаф" жамоаси ОЧЛ гуруҳ босқичи доирасида "Персеполис"га қарши Эронда баҳс юритади. Қаршиликлар 11 февраль куни эрта тонгда Тошкентдан Эронга Туркия орқали йўл олишади.