Нганну: "Мен ҳали ММАни тугатмадим, шунчаки хоҳлаган пайтим жанг қиламан"

"Мен ҳали ММАни тугатмадим. "Фаолиятимнинг шу босқичида" деганда нимани назарда тутяпсиз? Менга ҳали ҳам ММА ёқади. Ҳозир ҳар қачонгидан ҳам яхши формадаман. Охирги тўққиз ой давомида ҳар куни залга боряпман, чунки бу менга ёқади. Ҳозирча бу менинг асосий ишим. Албатта, бошқа ишлар ҳам бор, лекин бу асосий ишим. Эрталаб туриб, хурсандчилик билан залга бораман, хоҳлаган ишимни қиламан, кейин жанг қилиш имконияти бор-йўқлигини кўраман.

Бу эркин инсоннинг имтиёзи ҳам. Кўчага чиқасан, ёқтирган ишинг билан шуғулланасан, кейин жанг қилиш имконияти бўлса — жанг қиласан. Агар бундай имконият бўлмаса, ўз ишинг билан банд бўласан, пул топасан ва ҳаётни давом эттирасан.

Бирор ишни хоҳиш билан, завқ олиб қилсанг — энг яхши ҳолат шу. Менимча, жанглардан ҳақиқий лаззат ҳам ана шунда бошланади. Сен ўзингни мажбурдек ҳис қилмайсан, ҳеч ким сени жанг қилишга мажбурламайди. Ўзинг хоҳлаганинг учун жанг қиласан. Мен ҳозир айнан шундай ҳолатдаман", — деди Нганну.