Нодиржон Мирзаҳмедовнинг финал жанги ҳақидаги фикри

Жами 10 та вазн тоифасида ўтказиладиган финал жангларининг 5 тасида ўзбекистонлик боксчилар рингга кўтарилишади. Финал жангларини ҳамюртимиз Нодиржон Мирзаҳмедов бошлаб беради. -49 кг вазн тоифасидаги вакилимиз ҳиндистонлик Дипакка қарши рингга кўтарилади.

“Ярим финалдаги жангим яхши кечди, деб ўйлайман. Сабаби, нафақат бугунги жанг, балки бутун турнир учун мураббийларим Марат Қурбонов, Раҳматжон Рўзиохунов, Бекзод Ҳидиров, Тўлқин Қиличев билан тайёргарликни аъло даражада олиб боргандик. 

Маълумки, ярим финалда кучсиз рақибнинг ўзи бўлмайди. Тўғри тактика эвазига ғалаба қозондим. Ярим финалдаги рақибим билан бундан аввал ҳам жанг қилганман. Қирғизстонда ташкил этилган турнирда у билан тенгма-тенг жанг олиб боргандим, лекин ўшанда ҳакамлар унинг қўлини кўтаришганди. Ўша мағлубият учун реванш олишга эришдим.

Энди финалда ҳиндистонлик боскчи билан жанг қиламан. У билан аввал рингда тўқнаш келмаганман. Шундай бўлсада, рақибимнинг Осиё чемпионатидаги иштирокини кузатиб бордим. Мураббийларим билан керакли тактикаларни ишлаб чиқиб, Дипакни ҳам мағлуб этишга ҳаракат қиламан”, - деди Мирзаҳмедов.