Новак Жокович 20-маротаба "Уимблдон"даги юришини ғалаба бошлади

Дунёнинг олтинчи ракеткаси Новак Жокович мусобақадаги иштирокини ғалаба билан бошлаб олди. Сербиялик теннисчи илк даврада ATP рейтингида 41-ўринни эгаллаб турган франциялик Александр Мюллерни тўрт сет натижасига кўра мағлубиятга учратди - 6/1, 6/7(7), 6/2, 6/2.

Бу теннисчиларнинг ўзаро ўтказган иккинчи учрашуви эди - 2:0. Уч соату 20 дақиқа давом этган баҳсда Жокович 22, Мюллер 8 та эйс зарбасини амалга оширган. Брейклар бўйича мутлақ устунлик Новак томонида бўлди - 7 га 0! 

Жокович фаолиятида 20-маротаба Уимблдон турнирида иштирок этаётган бўлиб, ҳали бирон мартта ҳам илк босқичда мағлубиятга учрамаган. У "Катта Дубулға" турнирларида сўнгги бор "Australian Open-2006"да биринчи босқичда ютқазган эди. Энди Новак иккинчи даврада британиялик Дэниэл Эвансга қарши кортга чиқади. Эванс ўз ўрнида ватандоши Жей Кларкдан 6/1, 7/5, 6/2 ҳисобида устун келди.