ОАВ вакиллари учун Ўзбекистон бокс федерациясининг мурожаати

Қайд этиш лозимки, Осиё чемпионати қитъамиз миқёсидаги энг нуфузли мусобақа ҳисобланиб, ушбу чемпионатда эркаклар ва аёллар терма жамоамиз вакиллари  10 та вазн тоифасида рингга кўтарилишади.

Ушбу қитъа биринчилиги боксчиларимиз учун навбатдаги нуфузли мусобақаларга, жумладан, 2019 йилнинг сентябр ойида Россиянинг Екатеринбург шаҳрида бўлиб ўтадиган бокс бўйича Жаҳон чемпионатига  муносиб тайёргарлик кўриш, рақибларни ўрганиш ва албатта Осиёда ўзбек боксининг етакчилардан бири эканлигини яна бир маротаба исботлашга хизмат қилади. 

Куни кеча ушбу мусобақа юзасидан интернет сайтларида эълон қилинган информацион хабарлар Ўзбекистон бокс федерацияси матбуот хизмати ёки федерация мутассадилари билан келишилмаган ҳолда тарқатилганлиги сабабли, кенг жамоатчилик ўртасида турли ҳил баҳс-мунозараларга сабаб бўлди. 

Ҳурматли ҳамкасблар! Келгусида юқорида қайд этилган нуфузли мусобақалар олдидан расмий маълумотларни Ўзбекистон бокс федерацияси матбуот хизмати билан келишган ҳолда тарқатилиши мақсадга мувофиқ бўлар эди. 

Ўзбекистон бокс федерацияси юртимизда спорт соҳасида олиб борилаётган ишлар, хусусан ватанимиз спорти байроқдори саналмиш боксни оммага  кенг ёритилишида қилаётган кенг кўламли меҳнатингиз учун ўз миннатдорчилигини билдиради. Шу билан бирга, Ўзбекистон бокс федерацияси эшиклари ОАВ ходимлари учун доимо очиқ эканлигини маълум қилади.

Ўзбекистон бокс федерацияси матбуот хизмати