Омад туфайли асосий тўрга қўйилган Раҳимова Лондон турнирида 1/4 финалга чиқди

Вакиламиз мусобақанинг саралаш босқичи ҳал қилувчи финал учрашувида дунёнинг 54-ракеткаси, саралаш турнирида биринчи рақам остида таснифланган германиялик Татьяна Марияга мағлуб бўлганди. Шунга қарамай, у кейинчалик "лаки лузер" (омадли мағлуб) сифатида асосий тўрдан жой олди ва тўғридан-тўғри нимчорак финал босқичига йўл олди. 

Камилла Раҳимова кеча турнирнинг 1/8 финалида британиялик теннисчи, дунё рейтингида 160-ўринни эгаллаб турган Хэрриет Дартга қарши кортга чиқди. Икки соату 50 дақиқа давом этган учрашувда Раҳимова камбэк эвазига иродали ғалабага эришди - 5/7, 6/1, 7/5.  

Маълумот учун, бу теннисчиларнинг ўзаро ўтказган иккинчи учрашуви бўлди. 2024 йили Цинциннати турнир саралашида кечган илк баҳсда Дарт уч сет натижасига кўра зафар қучганди. Кечаги учрашувда Дарт 5, Раҳимова 1 та эйс зарбани амалга оширди. Қўшхатолар мезбон теннисчида кўпроқ бўлди - 8 га 5. 

Бугун WTA рейтингида 78-ўринни эгаллаб турган Камилла Раҳимова 1/2 финал чиптаси учун яна бир британиялик теннисчи Эмма Радукануга қарши кортга чиқади. Дунёнинг 42-ракеткасига қарши баҳс бизнинг вақт билан соат 16:30да бошланади. Бу теннис маликаларининг ўзаро ўтказадиган илк учрашуви бўлади.