12 июл 07:46
Янгиликлар

Бокс/ММА

Ортис 28 июль куни руминиялик боксчига қарши рингга чиқади

Супероғир вазн тоифасида жаҳон чемпионлик камари учун собиқ даъвогар Луис Ортис навбатдаги жангини 28 июль куни ўтказади.

Кубалик боксчи АҚШнинг Лос-Анжелес шаҳрида руминиялик Разван Кожануга қарши рингга кўтарилади. Бу ҳақда Американинг Showtime телеканали хабар берди. Айнан шу телеканал жангни трансляция қилади.

Оқшомнинг марказий жанги эса бирлаштирувчи чемпионлик жанги мақомида бўлади. Унда енгил вазн тоифасида WBC йўналиши чемпиони Майки Гарсия ҳамда IBF чемпионлик камари соҳиби Роберт Истер ўзаро тўқнаш келишади.

Эслатиб ўтамиз, 39 ёшли Луис Ортис WBC чемпиони америкалик Деонтей Уайлдерга қарши рингга чиққан ва ўнинчи раундда нокаут эвазига имкониятни бой берган эди.