Осиё чемпионати. Боксчиларимиз биринчи финал кунида 4 та олтин медални қўлга киритдилар

Сайтимизда бугун жангларда иштирок этган спортчиларимизнинг иштирокларидан матнли-трансляция уюштирилди.




19:10. Шу тариқа Осиё чемпионатининг бугунги кунидан олиб борган матнли-трансляциямизни якунлаймиз. Кун якунларига кўра 5 нафар боксчимиз рингга чиқди. Улардан 4 нафари финалда иштирок этиб, олтин медални қўлга киритган бўлса, яна бири ЖЧ йўлланмаси учун рингга чиқди ва ғалаба қозонди.

19:05. Бокс бўйича Ўзбекистон терма жамоаси август сўнггида Гамбургда бўлиб ўтадиган жаҳон чемпионатида тўлиқ таркиб билан қатнашадиган бўлди.

19:00. Санжар ҳакамлар қарорига кўра жанг ғолиби деб топилди! У ҳам Германияда бўлиб ўтадиган ЖЧ йўлланмасини қўлга киритди. Қойил!

18:51. Турсунов биринчи раундни ёмон ўтказгани йўқ. Лекин, катта устунлик қилди деб айта олмаймиз.

18:46. Энди рингга Санжар Турсунов чиқиб келмоқда. Чорак финалда мағлуб бўлган -91 кг вазн тоифасидаги боксчимиз ЖЧ йўлланмаси учун эронлик Салар Ғуломига қарши рингга кўтарилади.

18:44. Ва албатта БЕКТЕМИР МЕЛИҚЎЗИЕВ ҲАМ ҒОЛИБ! Бу тўртинчи олтин медаль!!!

18:39. Иккинчи раунд боксчимиз устунлигида кечди. Фақат, у озгина жароҳат олди. Умид қиламизки, жанг охиригача бўлади!

18:34. Мелиқўзиев жангни ёмон ўтказаётгани йўқ. Кузатамиз!

18:28. Энди Бектемир Мелиқўзиевнинг финал жангини кўрамиз!

18:11. Тожикистонлик боксчи Германияда бўлиб ўтадиган жаҳон чемпионатига йўлланма олди. Қўшниларимиз учун хурсандмиз!

18:00. Кечки жанглар бошланди. Айни пайтда -81 кг вазн тоифасида ЖЧ йўлланмаси учун жанглар бўлиб ўтмоқда. Бироздан сўнг Бектемир Мелиқўзиев финал жангини ўтказади.

17:40. Яна бироздан сўнг -81 кг вазн тоифасида жанглар бошланади.

16:50. Боксчиларимиз иштирокидаги жанглардан суратларни ҳам томоша қилинг!

16:35. Энди бироз танаффус. Соат 18:00да навбатдаги жанглар бошланади. Тахминан 18:30 да Бектемир Мелиқўзиев финал жангида рингга чиқади.

16:32. Муроджон Аҳмадалиев шарафига "Ўзбекистон" спорт мажмуасида давлатимиз мадҳияси янгради.

16:28. Сайтимизга учта финал жангининг видеолари жойлаштирилди. Кўра олмаганлар бўлса, айнан OLAMSPORT.COM да томоша қилишлари мумкин.

16:21. Энди бироздан сўнг -56 кг вазн тоифасидаги боксчилар тақдирланадилар. Хабарингиз бор, ушбу вазнда Муроджон Аҳмадалиев олтин медаль соҳибига айланган!

16:17. Исроил Мадримов шарафига яна давлатимиз мадҳияси янграмоқда.

16:16. Энди -75 кг вазн тоифасидаги спортчилар тақдирланмоқдалар.

16:09. Осиё чемпиони Элнур Абдураимов шарафига Ўзбекистон Республикаси мадҳияси янгради.

16:07. Айни пайтда -60 кг вазн тоифасида совриндор бўлган спортчилар тақдирланмоқда.

16:04. Энди ғолиб спортчиларни тақдирлаш маросими ўтказилмоқда.

16:00. Жанг тўхтатилди. Ҳакамлар қарорига кўра ғолиблик вакилимизга берилди! Қойил! Учинчи олтин медаль!

15:59. Мадримов жароҳат олди...

15:56. Жанг бошланди!

15:55. Исроил Мадримов рингга чиқиб келди. Унинг финалдаги рақиби Жанубий Корея вакили Дон Гюн Ли! Исроил бизга учинчи олтин медални туҳфа эта оладими?

15:35. Энди навбат Исроил Мадримовга. Тахминан 15 дақиқалардан сўнг унинг жанги бошланади.

15:28. Спортчилар жароҳат олишди. Жанг якунланди. Ҳакамлар қарорига кўра боксчимиз жанг ғолиби деб топилди! ЯНА БИТТА ОЛТИН МЕДАЛЬ!

15:25. Элнур ҳиндистонлик рақибига қарши жанги бошлади.

15:22. Элнур Абдураимов рингга чиқиб келмоқда!

14:55. Энди навбат Элнур Абдураимовга. Бироздан сўнг унинг жанги ҳам бошланади!

14:48. ҒАЛАБААА! ИЛК ОЛТИН МЕДАЛЬ ҚЎЛГА КИРИТИЛДИ! МУРООДЖОН АҲМАДАЛИЕВ ОСИЁ ЧЕМПИОНИ!

14:39. Биринчи раунд тўлик боксчимиз устунлиги остида кечди.

14:36. Жанг бошланди. Дастлабки олтин медални қўлга киритишга жуда яқинмиз!

14:33. Диққат қилинг! Рингга Ўзбекистон вакили Муроджон Аҳмадалиев чиқиб келмоқда.

14:14. Бироздан сўнг Муроджон Аҳмадалиев Осиё чемпионлиги учун бўлиб ўтадиган жангда хитойлик рақибига қарши майдонга тушади.

14:10. Айни пайтда -56 кг вазн тоифасида чорак финалда мағлуб бўлган спортчилар ўртасида ЖЧ йўлланмаси учун жанглар бўлиб ўтмоқда.

14:06. Бугунги жанг дастурларидан 5 нафар боксчимиз рингга чиқиш қиладилар:

Муроджон Аҳмадалиев - Жиавеи Жанг (Хитой) 

Шива Тапа (Ҳиндистон) - Элнур Абдураимов

Донг Юн Ли (Жанубий Корея) - Исроил Мадримов 

Бектемир Мелиқўзиев - Ерик Алжанов (Қозоғистон)

14:00. Ассалому алайкум. Тошкентда бокс бўйича бўлиб ўтаётган Осиё чемпионатидан матнли-онлайн трансляцияни бошлаймиз.