Осиё чемпионатида муваффақиятли иштирок этган шахматчиларимиз Тошкентда тантанали кутиб олинди

7-15 июль кунлари бўлиб ўтган мусобақада шахматчилар стандарт, рапид ва блиц йуналишлари буйича беллашишди. Унда қитъамизнинг 15 мамлакатидан тезкор шахмат йўналишида 422 нафар, блиц йўналишида 443 нафар, стандарт йўналишида 454 нафар ёш ақл идрок сохиблари иштирок этди.

Тезкор шахмат йуналишидаги баҳсларлда спортчиларимиз 4та олтин, 3та кумуш, 4та бронза медалларни қўлга киритиб, Осиё давлатлари ичида тезкор шахмат йўналиши бўйича тенгсиз эканликларини исботладилар. Стандарт йўналишидаги беллашувларда эса спортчиларимиз 7та олтин, 2та кумуш ва 1та бронза медалига сазовор бўлишди. Ушбу йўналишда хам спортчиларимиз жамоавий ҳисобда 1-ўринни эгалладилар. Блиц йўналиши якунларига кўра эса спортчиларимиз 5та олтин, 6та кумуш ва 1та бронза медалини қўлга киритдилар.

Мусобақада жамоанинг муваффақиятли иштирок этишида Умида Омонова (13 ёшгача)нинг ҳиссаси катта бўлди. У стандарт, тезкор шахмат ва блиц йўналишлари бўйича Осиёлик тенгдошларига хеч кандай имконият колдирмади ҳамда 3 та олтин медаль эгасига айланди.

Шунингдек, Ҳумоюн Бегмуратов (2та олтин, 1та кумуш), Афрўза Ҳамдамова (2та олтин, 1та кумуш), Давлат Маҳмуджонов (2та олтин, 1та бронза), Руқия Олимова (2та олтин), Ситороа Сапарова, Али Қосимов, Абдималик Абдисаломов, Зилола Актамова, Муҳаммадали Абдураҳмонов, Олмос Раҳматуллаев (1тадан олтин) каби шахматчилар терма жамоамиз учун муҳим бўлган медалларни қўлга кирита олишди.

Бугун тонгда ушбу Осиё чемпионатида муваффақиятли иштирок этган шахматчиларимиз юртимизга қайтиб келишди, деб хабар бермоқда Миллий олимпия қўмитаси Матбуот ва Медиа департаменти. Миллий олимпия қўмитаси Ўзбекистон шахмат федерацияси билан ҳамкорликда мусобақа қаҳрамонларини тантанали кутиб олиш маросимини ташкил этди. Унда Ўзбекистон Миллий олимпия қўмитаси Президенти Умид Аҳмаджонов, Жисмоний тарбия ва спорт вазири Шоакром Исроилов, МОҚ Бош котиби Жасур Матчанов, Жисмоний тарбия ва спорт вазири ўринбосари Шарифжон Мўминджанов, МОҚ ва Ўзбекистон шахмат федерацияси мутасаддилари, спортчиларнинг яқинлари, оммавий ахборот воситалари ходимлари иштирок этишди. Ёш шахматчиларимиз шарафига сайёҳлик автобусида чемпионлар паради ташкил этилди. Кейинчалик ушбу тантаналар Миллий олимпия қўмитасида ҳам давом эттирилди.

Миллий олимпия қўмитаси ушбу муваффақият билан Ўзбекистон шахмат федерацияси, ёш спортчилар ва уларнинг мураббийларини табриклаб қолади.