Ўсмирларимиз Непалдан 29 та медал билан қайтишди

Сайёрамизнинг энг баланд нуқтаси – Эверест чўққиси билан машҳур бўлган Непал давлатида ўтган мазкур Осиё чемпионатида ўсмирларимиз 6 та олтин, 3 та кумуш ва 6 та бронза медалини қўлга киритиб, умумжамоа ҳисобида 27 давлат орасида биринчи ўринни эгаллаган бўлишса, 5 та олтин, 3 та кумуш ва 6 та бронза медалига эгалик қилган қизлар терма жамоамиз 17 давлат орасида 2-ўринни банд этди.

Қарийиб бир ҳафта давомида ўтказилган қитъа чемпионатининг ўсмирлар ўртасида бўлиб ўтган мусобақаларида ҳамюртларимиздан Сарвар Тоштемиров ва Александр Ли учтадан олтин медалга сазовор бўлишди. Вазни 94 кг.гача бўлган полвонлар беллашувида баҳс юритган Саидмухтор Саидахроров эса бир йўла учта кумуш медаль билан тақдирланди. Мушаррафбек Раҳимов 2 та, Муҳаммадқодир Тоштемиров эса 1 та бронза медали соҳиби бўлди. Демак, қитъа чемпионатига йўл олган 8 нафар ўсмирларимиздан 5 нафари совриндорлар сафидан ўрин эгаллашди.

Қизлар ўртасида бўлиб ўтган мусобақаларда ҳам спортчиларимиз ўзларига билдирилган ишончга муносиб бўлдилар. Жумладан, 75 килограмм вазн тоифасида баҳс юритган Гулноза Аҳмадова даст кўтаришда ҳам, силтаб кўтариш машқларида ҳам энг юқори натижани қайд этиб, иккикураш натижасига кўра ҳам Осиёда тенгсиз деб топилди.

Оғирлик вазни 63 килограммгача бўлган қизлар мусобақасида Ватанимиз шарафини ҳимоя қилган Кумушхон Файзуллаева иккита олтин ва битта бронза медалига сазовор бўлди. Шунингдек, Турсуной Жабборова учта кумуш, Шахло Абдуллаева учта бронза ва ниҳоят, Шодмоной Очилова иккита бронза медалини қўлга киритишди.

Шу тариқа, қизлар терма жамоамиз умумжамоа ҳисобида Хитой давлатидан кейин иккинчи ўринни эгаллади. Кучли учликни эса Таиланд термаси якунлаб берди.

Энди ёш полвонларимиз жорий йилнинг октябрь ойида Жанубий Кореяда ўтказиладиган Осиё кубоги баҳсларига тайёргарлик кўрадилар.