Ўзбек курсанти ММА камарини қўлга киритди

Мазкур нуфузли турнирда 84 килограмм вазн тоифасида Ўзбекистон шаънини Қуролли Кучлар академиясининг 4-босқич курсанти Бекзод Нурматов ҳамда Абдулазиз Утамуродов ҳимоя қилди.

Мусобақанинг ярим финал беллашувида Абдулазиз Утамуродов қирғизистонлик рақиби Қодир Курстан ўғлини техник нокаут билан мағлубиятга учратди. Бекзод Нурматов эса яна бир Қирғизистон вакили Жакип Туганбаев билан кечган оғир баҳснинг иккинчи раундида оғритувчи усулни моҳирлик билан қўллаган ҳолда рақибидан устун келди. 

Финалда икки ҳамюртимиз ўзаро куч синашиши керак эди. Аммо, А.Утамуродов биринчи жангда оёқ қисмидан олган тан жароҳати ва мураббийларнинг қаршилиги сабаб жангни ўтказмади, ғалаба эса Б.Нурматов номига ёзилди.

Шу тариқа, Бекзод Нурматов профессионал фаолиятидаги навбатдаги мусобақада – аралаш курашларнинг ММА йўналиши бўйича Гран-при туркумига кирувчи “Батир баши” IV этно турнирининг камарини Ўзбекистонга олиб келди.