Ўзбекистон бутунжаҳон кўчманчи халқлар ўйинларида жами 33 та медални қўлга киритди

Қирғизистон Республикасининг Чўлпон-Ота шаҳрида бўлиб ўтаётган Бутунжаҳон кўчманчи халқлар ўйинларининг бешинчи кунида спортчиларимиз кураш ва самбо бўйича ҳам баҳсларга киришгани, курашчиларимиз Мухриддин Тиловов (-66кг) ва Темурхон Тўраев (-81 кг) ўйинларнинг олтин медалини қўлга киритишгани ҳамда кўпкаричиларимиз финал чиқишгани ҳақида хабар берган эдик.

Ўйинларнинг кўпкари бўйича финал баҳсларида Қирғизистон жамоаси билан куч синашган жамоамиз мезбонларга 32:9 ҳисобида имкониятни бой бериб, кумуш медални қўлга киритди. Кўпкари беллашувларида 11 та давлатдан ташриф буюрган жамоалар иштирок этиб, Ўзбекистон жамоаси Бошқирдистон, Франция ва Қозоғистон жамоаларини мағлубиятга учрата олди.

Самбо бўйича ўтказилган баҳсларда ҳам вакилларимиз салмоқли натижаларни қўлга киритишди. Юртдошларимиз Давлат Самраев (-62 кг), Бекзод Каримов мутлақ вазн тоифасида олтин медаль билан тақдирланган бўлса, Омон Ғаниев (-52кг), Шербек Рўзиев (-68кг) кумуш медалга сазовор бўлди.

Шундай қилиб, мазкур ўйинлардан илк бора расман иштирок этаётган Ўзбекистон спорт делегацияси якуний натижаларга кўра жами 33 та медални (7 та олтин, 8 та кумуш, 18 та бронза) қўлга киритиб, умумжамоа ҳисобида бешинчи ўринни эгаллади .

Ўзбекистон делегацияси 13 та спорт тури бўйича 58 нафар спортчи билан иштирок этиб, кураш, самбо, гюлеш (Азарбайжон кураши), аширтмали аба гюлеши (Туркия кураши), алиш кураши (Қирғизистон кураши), қирғиз кураши, армрестлинг, мас-рестлинг, лочин ови, улоқ кўпкари, отда енгиш турлари бўйича медалларни қўлга киритди.