Ўзбекистон шахмат федерациясида йил лауреатлари тақдирланди

Унда ўзбек шахмат мактабининг бугунги ҳолати, мамлакатимиз шахматчиларининг Халқаро турнирлар ва жаҳон чемпионатларида эришаётган ютуқлари омили, умумий ўрта таълим мактабларида шахматнинг фан сифатида ўқитилиши каби кўплаб масалаларга тўхталиб ўтилди. 

Шундан сўнг 2018 йил якунларига кўра турли номинациялар бўйича ғолибларга диплом ҳамда эсдалик совғалари топширилди. Жумладан, Нодирбек Ёқуббоев – 2018 йилнинг энг яхши шахматчиси, деб эътироф этилган бўлса, Гулруҳбегим Тоҳиржонова хотин-қиз шахматчилар орасида шундай номга сазовор бўлди. 

Яқинда амалдаги жаҳон чемпиони Магнус Карлсенни мағлубиятга учратиб, ўзига хос шов-шув кўтарган халқаро мастер Шамсиддин Воҳидов эса 2018 йилнинг 16 ёшгача бўлган энг яхши шахматчиси, яна бир истеъдодли спортчимиз Умида Омонова – 2018 йилнинг 20 ёшгача бўлган энг яхши аёл шахматчиси, деб топилди. “Йилнинг энг яхши мураббийи” номинациясига таниқли мутахассис Владимир Егин муносиб кўрилди. 

Шунингдек, тадбирда “Энг яхши шахмат клуби”, “Энг яхши шахмат федерацияси бўлими”, “Энг яхши арбитр”, “Ижтимоий тармоқларда шахматни энг яхши ёритган журналист”, “Оммавий ахборот воситаларида шахматни энг яхши ёритган журналист” каби номинациялар бўйича ҳам ғолиблар муносиб тақдирланди.