Ўзбекистоннинг чорак финалдаги рақиби маълум бўлди

Жасур Абдураимов бошчилигидаги ёшларимиз 2-турда Австралияни мағлуб (3:2) этиб, гуруҳда муддатдан аввал биринчи ўринни нақд қилишганди. Энди чорак финалда терма жамоамиз “C” гуруҳида иккинчи ўринни эгаллаган жамоа билан тўқнаш келади.

Бугун ушбу гуруҳда 3-тур баҳслари якунланди. Япония 7 очко билан биринчи, Эрон эса 5 очко олиб иккинчи бўлди. Айнан Эрон чорак финалда терма жамоамизга рақиблик қилади.

Бўлажак баҳс Жаҳон чемпионати йўлланмаси учун кечади. Ушбу ўйин ғолиби кейинги йили Жанубий Кореяда ўтадиган Жаҳон (U-20) чемпионатига йўлланмани қўлга киритади. Мазкур баҳс, 24 октябрь куни Тошкент вақти билан соат 21:15да бошланади.

Ундан олдин Ўзбекистон гуруҳ босқичининг сўнгги турини Хитойга қарши ўтказади. Бу учрашув эса 21 октябрь куни Тошкент вақти билан соат 21:30да старт олади.