Поветкинда яна допинг топилди, Стиверн билан жанг бекор қилинди

Бутунжаҳон антидопинг ассоциацияси бу маълумотни расман тасдиқлади. Шу йилнинг 6 декабрь куни Поветкиндан олинган тахлил ижобий натижа берган. Унинг қонида тақиқланган препарат – Остарин моддаси борлиги аниқланди.

Табиийки, WBC ташкилоти россиялик боксчига бугун кечқурун Екатеринбург шаҳрида Бермэйн Стивернга қарши ўтказиладиган чемпионлик жангини бекор қилди.

“Поветкин дисквалификация қилинади. Стиверннинг жамоаси бизни бугунги жангда иштирок этмаслиги бўйича огоҳлантирди”, – деди WBC ташкилоти президенти Хосе Сулаймон.

Остарин – SARM гуруҳига мансуб дори воситаси бўлиб, машғулотларда чидамлиликни ошириш учун қабул қилинади.

Эслатиб ўтамиз, бу Поветкин билан боғлиқ иккинчи ҳолат бўлди. Шу йилнинг баҳорида Деонтей Уайлдерга қарши ўтказилиши керак бўлган жанги олдидан унинг қон таркибида Мельдоний моддаси аниқланганди.