Президент Кубогида икки шахматчимиз қўшҳоким бўлиб олди

Мусобақада дунёнинг турли мамлакатларидан келган гроссмейстерлар бош соврин учун баҳс олиб боришяпти. Ҳиндистонлик Ниҳал Сарин (2701) турнирда биринчи рақам остида саралан. У кеча ўтказилган 4-турда россиялик Александр Гришук билан дуранг ўйнади. Бу турда биргина Юрий Кузубов ғалабага эришди. Украиналик гроссмейстер германиялик Фредерик Свэнни мағлубиятга учратди.

Тўртинчи турнинг қолган барча партияларида томонлар муросага келишди. Мусобақада бешинчи рақам остида сараланган ҳамюртимиз Шамсиддин Воҳидов (2641) рейтингда ўзидан юқорида бораётган арманистонлик Шант Саргсян билан муросага келди. Гроссмейстеримиз Абдималик Абдисалимов (2561) ҳам ўзидан юқорида турган франциялик Максим Лагарде (2608 ) билан дуранг натижа қайд этди. Яна бир ёш гроссмейстеримиз Муҳиддин Мадаминов (2552) эронлик рақиби Данешвар Бардия (2600) билан дуранг ўйнади. 

Президент Кубогининг 4-туридан кейин Шамсиддин Воҳидов, Муҳиддин Мадаминов ва Ниҳал Сарин 3 очкодан жамғариб, турнир жадвалида қўшҳокимлик қилишяпти. Қўшимча коэфицентларга кўра Шамсиддин ҳамда Муҳиддин биринчи ва иккинчи ўринларни банд этган. 

Бугун 5-турда ўзбек дербисига гувоҳ бўламиз. Икки пешқадам Шамсиддин Воҳидов ва Муҳиддин Мадаминов ўзаро тўқнаш келади. Шамсиддин бугун оқ доналарда ўйнайди.  Абдималик Абдисалимов эса Данешвар Бардияга қарши қора доналарда баҳс олиб боради.