Профессионал бокс. Ўзбекистон чемпионатида кучлилар сараланмоқда + ФОТО

Асосий жанг оқшомидан аввалги куни вазн ўлчаш маросими ва очиқ машғулотлар ўтказилди. Шуни алоҳида таъкидлаб ўтиш лозимки, ярим финал бахслари билан бир қаторда ўртоқлик жанглари учун Озарбайжон ва Қозоғистондан ҳам профессионал чармқўлқоп усталари  таклиф этилди. Шунинг учун, махаллий мухлислар ва қўшни вилоятдан ташриф буюрганлар учун ҳам ушбу жанг кечаси катта қизиқиш уйғотди. Қолаверса, Хонобод шаҳри ҳокимияти ва Андижон вилояти жисмоний тарбия ва спорт бошқармаси томонидан ташкилотчилик юқори савияда йўлга қўйилди. Хонобод шаҳри ҳокими томонидан мехмон боксчи ва мураббийларга зарбоф чопон кийдирилиб, ўзига хос эсдалик совғалари ҳам тақдим этилди. Бир сўз билан айтганда ушбу жанг оқшоми барчада катта таассурот қолдирди. Шу ўринда ташкилотилик учун, Хонобод шаҳри ҳокимияти жумладан Мусохон Мамадалиевга, жисмоний тарбия ва спорт бошармаси мутасаддиларига ҳамда тажрибали мураббий, профессионал бокс Федерацияси бош директори Набижон Исмоновларга Ўзбекистон профессионал бокс Федерацияси номидан ўз миннатдорчилигимизни билдирамиз.

Дастлаб  ўртоқлик жанглари ўтказилди. Ринга биринчи бўлиб, 61 кг вазн тоифасида мезбон Абдулазиз Нажмиддинов ҳамда қашқадарёлик Шоҳрух Хикматуллаевлар кўтарилди. Ушбу жангда техник нокаут билан Абдулазиз Нажмиддинов ғалаба қозонди. 69 кг вазн тоифасида Озарбайжондан ташриф буюрган Роман Закиров Тошкент шаҳри вакили Иброхим Назирбаевга қарши жанг олиб борди. Муросасиз ўтган қарама қаршиликда ўртоқлик учрашувга хос тарзда дуранг қайд этилди. 76 кг вазнда эса, яна бир мехмон боксчи қозоғистонлик Сейлхан Қуралбоев яна бир тошкентлик тажрибали мураббий Зуфар Сулаймонов шогирди Равшанбек Махаммаджоновга қарши жанг олиб борди. Ушбу жангда ҳамюртимиз Равшанбек яққол устунлик билан ғолиб чиқди.

Асосий ярим финал қарама-қаршиликлари  ҳам шиддатли кечди. 10 та вазн тоифасида 6 раунддан иборат бўлган жангларнинг 50 кг вазн тоифасида андижонлик Шаҳзодбек Шаробиддинов, 53 кгда Нуржан Сериков(Навои), 57 кгда Бексултон Раушанов(Тошкент вил), 61 кгда Бургут Хожибоев (Наманган), 63 кгда Абдурасул Исмоилов (Хоразм), 66 кгда Мухаммадсалим Сотиболдиев (Тошкент шаҳри), 69 кгда Музаффар Рашидов (Сурхондарё), 76 кгда Ражаббой Атаназаров (Хоразм), 79 кгда Шахзод Маузеров (Сурхондарё), сўнги +90 кг вазн тоифасида Ренат Рахимов (Қорақалпоғистон)лар ғалаба қозониб, финал баҳсларига йўл олишди.

Эслатиб ўтамиз, ярим финал беллашувларининг навбатдагиси 14 июль куни Самарқанд шаҳрида бўлиб ўтади.

Ўзбекистон профессионал бокс федерацияси матбуот хизмати