Қаршида ҳисоб бўйича 13-ихтисослаштирилган дзюдо зали фойдаланишга топширилди ФОТОРЕПОРТАЖ

Маросимда Ўзбекистон спортни ривожлантириш вазири маслаҳатчиси Аваз Каримов, МОҚ бош котиби Ойбек Касимов, МОҚ раиси ўринбосарлари Азизжон Камилов, Равшан Эрматов, Сакен Полатов, Қарши шаҳри ҳокими Нормўмин Холбоев ва бошқа мутасаддилар ҳозир бўлишди. 

Жаҳон талабларига жавоб берадиган, кўрган кишининг кўзини қувонтирадиган спорт масканининг шу мактаб, шу маҳалла ёшларига айни таътил кунлари фойдаланишга топширилиши болажонларнинг қувончига сабаб бўлди. 

Ўзбекистон халқ таълими вазирлиги, Ўзбекистон дзюдо федерацияси томонидан амалга оширилаётган ушбу лойиҳа доирасида мамлакатимизнинг 11 вилоятида жами 13 та ихтисослаштирилган дзюдо залларининг бунёд этилиши режалаштирилган эди. Бугун Қаршида ана шу дзюдо залларининг сўнггиси ёшлар ихтиёрига топширилди. 

"Бу спорт объэктлари аҳоли зич яшайдиган, яқин атрофда спорт мажмуалари йўқ ҳудудларда бунёд этиляпти. Куни кеча ҳурматли Президентимиз Шавкат Миромонович раисликларида ўтган видеоселекторда ҳам айнан маҳаллаларда спорт мажмуаларини бунёд этиш, мусобақаларни кўпроқ ўтказиш ва шу йўл билан селекция жараёнини ташкил этиш, терма жамоаларга муносиб номзодларни етказиб беришга кўмаклашиш масаласида сўз борган эди. Мақсадимиз – жамиятнинг бошланғич нуқтаси бўлган оила ҳамда маҳаллаларда оммавий ва профессионал спортни янада ривожлантириш, кенг аҳоли қатлами орасида соғлом турмуш тарзини қарор топтиришдан иборат", - деди МОҚ раиси ўринбосари, мамлакат дзюдо федерацияси раиси Азизжон Камилов.  

Ўзбекистон халқ таълими вазирлиги, Ўзбекистон дзюдо федерацияси ва қатор ҳамкор ташкилотлар кўмагида амалга оширилаётган бу хайрли ишлар давлатимиз раҳбари томонидан олиб борилаётган ислоҳотлар учун хизмат қилади.