Қосимжонов Мамадияров ва Пономарев билан дуранг ўйнади

Буюк саркарда ва давлат арбоби Амир Темур таваллудининг 680-йиллигига бағишлаб ўтказилаётган ушбу супер турнирда дунё тан олган тўрт нафар гроссмейстер иштирок этяпти.

Озарбайжонлик Шахрияр Мамадияров 2013 йили блиц йўналишида жаҳон чемпиони бўлган. Исроиллик Борис Гельфанд 2009 йилда Жаҳон Кубоги соҳибига айланган. Украиналик Руслан Пономарев 2002-2003 йилларда жаҳон чемпионлигига эришган. Ҳамюртимиз Рустам Қосимжонов эса 17-жаҳон чемпиони хисобланади.

Бугун куннинг иккинчи ярмида “Миран” меҳмонхонасида мусобақанинг тантанали очилиш маросими бўлиб ўтди. Шундан сўнг баҳсларга старт берилди. Бугун шахматчилар учтадан учрашув ўтказишлари керак эди.

Ана шу ўйинлардан тўрттаси якунланди. Рустам Қосимжонов аввалига Руслан Пономарев, кейин эса Шахрияр Мамадияров билан дуранг ўйнади. Айн дақиқаларда у Борис Гельфанд билан муносабатларига ойдинлик киритмоқда. Ҳозирча биргина Мамадияров битта ғалабага эришди.

Маълумот учун, Шахмат Юлдузлари турнирининг умумий мукофот жамғармаси 50 минг Америка Қўшма Штатлари долларини ташкил этади. Ғолиб гроссмейстер 20 минг долларга эга бўлади.