Қозоғистон ҳақиқатдан ҳам Болтаев - Консбеков жанги юзасидан шикоят қилдими?

Мусобақа доирасида -75 кг вазн тоифасида юртимиз шарафини ҳимоя қилаётган Шавкатжон Болтаев бир неча кун олдин ўзбек бокси тарбияланувчиси, бугунги кунда Қозоғистон терма жамоаси номидан мусобақаларда иштирок этаётган Аман Консбековни 4:1 ҳисобида мағлуб этганди.

Қозоғистон томон ушбу жанг натижасидан норози бўлгани ва бу борада шикоят киритиши ҳақида хабарлар тарқалганди. 

Биз ушбу масала юзасидан Ўзбекистон бокс федерациясига мурожаат қилдик. Федерация бош котиби Шоҳид Тиллабоев эса ушбу вазият борасида муносабат билдирди.

"Бу мусобақа World Boxing конституцияси ва техник қоидалари асосида ўтказилади. Мусобақа регламентига кўра, жанг натижалари бекор қилинмайди ва қайта кўриб чиқилмайди. 

Бу жангда мухлислар ғалаба қозонди деган бўлардим. Баҳсда ўзбек боксининг икки ажойиб тарбияланувчиси ўртасидаги жангни томоша қилдик. Бу жангни финалдан олдинги финал деган бўлардим. Аман Консбеков ҳам ўзбек бокси тарбияланувчиси. У Қозоғистон терма жамоаси сафига бориб қўшилганига кўп вақт бўлгани йўқ. У билан муносабатларимиз яхши. 

Қўшимча сифатида айтишим мумкинки, йигитларнинг ҳар иккиси ҳам ўзбек бокси мактаби тарбияланувчилари эканлигини инобатга олсак, бу Ўзбекистон боксининг қандай даражада эканлигини кўрсатиб берди. Уларнинг иккиси ҳам дўст, биргаликда улғайишган. Шунинг учун, бу мавзуда қандайдир "негатив" фикрлар билдирилмаслигини истардим" - деди Шоҳид Тиллабоев сайтимиз журналисти Азиз Тўхтамуродов билан суҳбатда.