Қудратилло Абдуқаҳҳоровнинг навбатдаги жанг манзили, санаси ва рақиби маълум!

Абдуқаҳҳоров 30 март куни АҚШда япониялик Кейта Обарага қарши рингга кўтарилади. Бу маълумотни биз билан бўлган суҳбатда чарм қўлқоп устамизнинг ўзи ҳам тасдиқлади. 

Аслида ушбу жанг Малайзияда ўтказилиши режалаштирилган эди. Лекин бизга номаълум сабабларга кўра жанг бекор қилинди. Ўз вақтида WBC Silver чемпионлик камарини ҳимоя қила олмаган ҳамюртимиз бу камардан воз кечди. 

Абдуқаҳҳоров ва Обара ўртасидаги жанг ярим ўрта вазн тоифасида IBF чемпионлик камари учун саралаш жанги вазифасини ўтаб беради. Ғолиб боксчи кейинги жангини росмана чемпионлик камари учун ўтказиш имкониятини қўлга киритади. 

Маълумот учун, Қудратилло Абдуқаҳҳоров (15-0, 9 KOs) профессионал боксдаги фаолияти давомида 15та жанг ўтказиб, уларнинг барчасида ғалаба қозонган. Тўққизта жангда рақибларини нокаутга учратган.

Обара эса проф боксдаги 12 йиллик фаолияти давомида 24та жанг ўтказган бўлиб, уларнинг 20тасида ғалаба қозонган. Ўн саккизта жангда рақибларини нокаутга учратган. Учта жангда мағлубиятга учраган ва эътиборлиси барчасида нокаутни қабул қилиб олган. Битта жанг дуранг билан якунланган.