Қуйи Чирчиқда “Янги Ўзбекистон ёшлари бирлашайлик!” шиори остида спорт мусобақалари ташкил этилди

Ўзбекистон Республикаси Президентининг 2022-йил 19-январдаги “Маҳаллаларда ёшлар билан ишлаш тизимини тубдан такомиллаштириш чора-тадбирлари тўғрисида”ги қарори ижросини таъминлаш мақсадида Тошкент вилояти мҳаллаларида бир қатор ишлар амалга оширилмоқда. 

Чунончи, маҳалладаги ёшлар етакчиси фаолиятини намунавий ташкил этиш мақсадида Тошкент вилояти Қуйи Чирчиқ тумани “Пахтазор” маҳалласи танлаб олинди.

Маълумот учун: “Пахтазор” маҳалласида жами 3 853 нафар аҳоли истиқомат қилиб келмоқда. Маҳаллада 30 ёшгача бўлган ёшларнинг умумий сони 1 790 нафар бўлиб, шундан мактабгача тарбия ёшидаги болалар 508 нафар, 7-17 ёшли болалар 735 нафар ҳамда 18-30 ёшлилар эса 547 нафарни ташкил қилади.

Соғлом турмуш тарзини оммалаштириш мақсадида “Янги Ўзбекистон ёшлари бирлашайлик!” шиори остида спорт мусобақалари ташкил этилди. Республика спорт федерациялари ва ассоциациялари иштирокида малакали ҳакамлар ва мутахассислар томонидан ташкил этилган мусобақалар ёшларда катта қизиқиш уйғотди.

“Пахтазор” спорт ўйингоҳида футбол бўйича “Ҳоким кубоги” мусобақаси ўтказилди. Унда маҳалланинг 14 та кўчасидан тузилган жамоалар ўзаро мусобақалашмоқда. Дастлабки кунги саралаш босқичида 8 та жамоа таркибида жами 80 нафар маҳалла ёшлари футболчи сифатида иштирок этди. Шунингдек, мусобақалар давомида 460 нафарга яқин ёшлар ҳам томошабин сифатида қамраб олинди.

Волейбол бўйича маҳалла хотин-қизлари ўртасида ташкил этилган “Прокурор кубоги” мусобақасида кечаги баҳсларда жами 40 нафар хотин-қиз иштирокчи сифатида жалб этилди. Камондан отиш мусобақаси эса маҳалла ёшлари ва Миллий гвардия ходимлари иштирокида ташкил қилинди.