Рафаэль Надаль: “Истомин ҳақли ғалабага эришди”

Маълумки, ҳамюртимиз Денис Истомин Австралия Очиқ чемпионатининг иккинчи босқичида дунёнинг иккинчи ракеткаси, сербиялик Новак Жоковични мағлубиятга учратиб, катта шов-шувга сабабчи бўлганди.

Австралия Очиқ чемпионатининг амалдаги ғолиби ҳисобланган Жоковичнинг бу мағлубияти юзасидан дунёнинг собиқ биринчи ракеткаси, испаниялик машҳур теннисчи Рафаэль Надаль ўз фикрини билдирди.

“Очиғи, ўйинни тўлиқ кўрмадим. Мен ўз жамоам билан бирга машғулот ўтказаётгандим. Фақат сўнгги геймни томоша қилдим. Энди ҳар доим ҳам ғалаба қозонавермайсан.

Новак Австралия Очиқ чемпионатида 6 марта чемпион бўлган. Икки ҳафта аввал Доҳадаги нуфузли мусобақада ҳам зафар қучди. Маррейни финалда енгди. Истомин билан баҳсда шунчаки кутилмаган ҳолат рўй берди.

Денис жуда яхши ўйин намойиш этди ва ҳақли равишда ғалаба қозонди. Жокович эса ўз ўйинини кўрсата олмади”, - деди Надаль.