Расман. Шоҳжаҳоннинг 12 январь кунги 12-жанги тасдиқланди

Аввал хабар берганимиздек, ҳамюртимиз 12 январь куни АҚШнинг Нью-Йорк шаҳридаги Turning Stone Resort Casino аренасида америкалик енгилмас боксчи Сони Фредриксон (18-0, 12 KOs)га қарши рингга кўтарилади.

“Жанг санаси ва манзили расман тасдиқланди. Энди бор эътиборни 12 январь кунги жангимга қаратаман. Фредриксон кучли боксчи. Мен каби барча жангларини ғалаба билан якунлаган.

Агар бўлажак жангда ғалаба қозонсам, рейтингда кучли ўнталикка кириб оламан. Бу эса кейинги жангларимда чемпионлик камари учун рингга чиқишим мумкинлигини англатади”, - деди сайтимизга берган интервьюсида Шоҳжаҳон Эргашев.

Маълумот учун, америкалик боксчи фаолияти давомида 18 маротаба жанг ўтказган бўлиб, уларнинг барчасида ғалабага эришган. Ўн иккита жангда рақибларини нокаутга учратган. Шоҳжаҳон эса 11та жангининг барчасини муддатидан аввал нокаут билан якунлаган.