Расман. Уч карра Олимпия ўйинлари совриндори фаолиятини якунлади+ФОТО

Пекин, Лондон ва Рио Олимпиадасининг бронза медали совриндори, икки кара жаҳон чемпиони, Осиё чемпиони, кўплаб халқаро мусобақалар ғолиби катта спорт билан хайрлашди.

Энди ҳамюртимиз мураббийликда фаолиятини давом эттиради. У терма жамоа мураббийлар штабида ўзи муваффақият қозонган вазн тоифалари (-60 ва -66 кг)да устозлик қилади.

Яна ҳам аниқроғи, ушбу вазн бўйича маслаҳатчи мураббий сифатида фаолият юритади.

Ришод Собиров икки вазн тоифасида Олимпиада совриндори бўлган дунёдаги камсонли дзюдочилардан бири ҳисобланади. У Пекин-2008 ва Лондон-2012 Олимпиадаларида -60, Риода эса -66 кг вазн тоифасида бронза медалини қўлга киритган.

Кўплаб Давлат мукофотлари соҳиби Ришод Собировга мураббийлик фаолиятида ҳам омад ва зафар ёр бўлишини, ўзи сингари чемпион спортчиларни тарбиялашини тилаб қоламиз!

Анвар Илясов олган суратлар