Равшан Эрматов МОҚ раисининг биринчи ўринбосари лавозимига сайланди

Кун тартибидаги асосий масала Миллий олимпия қўмитаси раисига биринчи ўринбосар сайлашдан иборат эди, деб хабар қилмоқда Туризм ва спорт вазирлиги расмий сайти. 

Йиғилишда Миллий олимпия қўмитаси раҳбарияти, спорт турлари бўйича федерация ва ассоциация ходимлари ҳамда оммавий ахборот воситалари ходимлари иштирок этишди.

Миллий олимпия қўмитаси раисининг биринчи ўринбосари лавозимига Эрматов Равшан Сайфуддинович номзоди илгари сурилди. Кенгаш аъзолари томонидан Р.Эрматов номзоди бир овоздан маъқулланди ва сайланди.

Эслатиб ўтамиз, Равшан Эрматов шу кунга қадар бир вақтнинг ўзида Жисмоний тарбия ва спорт вазирининг биринчи ўринбосари, Ўзбекистон Футбол ассоциацияси биринчи вице-президенти лавозимларида ишлаб келаётган эди.

Равшан Сайфиддиновичга янги бошлаган иш фаолиятларида омад ёр бўлишини тилаб қоламиз!

Аввалроқ Olamsport.com сайти Равшан Эрматов ушбу лавозимда иш бошлаши ҳақида хабар берганди. Бугун ушбу маълумот расман тасдиқланди.