Эшитдик-да! Равшан Эрматов - МОҚ раисининг биринчи ўринбосари

Бугун бироз аввал Термизда кураш бўйича Президент соврини учун Ал-Ҳаким- Ат-Термизий халқаро турнири старти олдидан ўтказилган анжуманда модераторлик вазифасини бажарган Халқаро пресс клуб раиси Шерзод Қудратхўжаев ҳам Равшан Эрматовни МОҚ раиси ўринбосари деб таништирган.     

Хабарингиз бор, Ўзбекистон жисмоний тарбия ва спорт вазирлиги тугатилиб, унинг ўрнида Ўзбекистон Республикаси туризм ва спорт вазирлиги ташкил этилди. Президент фармони билан янги вазирликка Бош вазир ўринбосари Азиз Абдуқаҳҳорович Абдуҳакимов тайинланади. Улуғбек Аъзамов туризм ва спорт вазирининг биринчи ўринбосари, Абдулазиз Аққулов, Авазжон Каримов ва Зариф Казаковлар вазир ўринбосарлари лавозимларига тайинланади.

Авазжон Каримов шу кунгача Ўзбекистон жисмоний тарбия ва спорт вазири ўринбосари лавозимида ишлаб келаётганди. Демак, бу мутахассис номи ўзгартирилган вазирликдаги фаолиятини давом эттиради. Рўйхатда Эрматовнинг исм-шарифи келтирилмаган ва у тез орада расман Миллий олимпия қўмитаси раиси Рустам Шоабдураҳмоновнинг биринчи ўринбосари сифатида иш бошлайди.   

Бизга хабар беришларича, келаётган янги ҳафтада МОҚда ташкил этиладиган Ассамблея йиғилишида Равшан Эрматов кенг спорт жамоатчилигига расман таништирилади. Эрматов параллел равишда Ўзбекистон футбол ассоциацияси биринчи вице-президенти лавозимида ҳам фаолиятини давом эттиради.