Рустам Қосимжонов учинчи партияда ҳам дуранг ўйнади, ҳозирча Мамадияров пешқадам

Буюк саркарда ва давлат арбоби Амир Темур таваллудининг 680-йиллигига бағишлаб ўтказилаётган ушбу супер турнирда дунё тан олган тўрт нафар гроссмейстер иштирок этяпти.

Озарбайжонлик Шахрияр Мамадияров 2013 йили блиц йўналишида жаҳон чемпиони бўлган. Исроиллик Борис Гельфанд 2009 йилда Жаҳон Кубоги соҳибига айланган. Украиналик Руслан Пономарев 2002-2003 йилларда жаҳон чемпионлигига эришган. Ҳамюртимиз Рустам Қосимжонов эса 17-жаҳон чемпиони хисобланади.

Бугун шахматчилар учтадан учрашув ўтказишди. Ўтказилган олтита партиядан фақат биттасида ғолиб аниқланди. Қолган бешта партияда кучлар тенг келди. Шахрияр Мамадияров битта ғалаба ва иккита дуранг билан биринчи кунги баҳслардан сўнг пешқадамлик қиляпти.

Рустам Қосимжонов эса уччала партияда ҳам дурангга эришди. У аввалига Руслан Пономарев, кейин Шахрияр Мамадияров ва сўнгги баҳсда Борис Гельфанд билан билан дуранг ўйнади.

Маълумот учун, Шахмат Юлдузлари турнирининг умумий мукофот жамғармаси 50 минг Америка Қўшма Штатлари долларини ташкил этади. Ғолиб гроссмейстер 20 минг долларга эга бўлади.