Самвел Бабаян: “Йигитлар юракдан ўйнашди, бошқача бўлиши мумкин эмасди”

“Мамлакатимиз оғир жудоликка учраганидан хабарингиз бор. Бугун биз бошқача ўйнай олмасдик ҳам, йигитлар юракдан ўйнашди. Ғалаба билан барчани табриклайман. Олдинга интилишда давом этамиз, - деди Бабаян. 

- Иккала жамоа ҳам жуда эҳтиёткор ўйнади. Сўнгги дақиқаларда ўз шогирдларингиздан гол кутганмидингиз?

- Биз қийин ўйин бўлишини кутгандик. Қатар ҳам яхши ҳимояланди, учрашув охирида ўйинни кучайтирганимизга келсак, захирадан тушганлар бунга тайёр эдилар. Мақсадимиз ғалаба қозониш ва олдинга интилиш эди. Бунга эришдик. Биз гуруҳда биринчи ўринга чиқдик. Энди бор эътиборимизни кейинги баҳсга қаратамиз. Ҳар бир учрашувга алоҳида тайёргарлик кўриш ва унда ғалаба қозониш учун майдонга тушамиз.

- Иккинчи бўлимда Ўзбекистон яхшироқ ўйнади. Баҳс охирида ўйинни кучайтириш ва гол уриш асосий режангиз эдими?

- Албатта, режамиз шундай эди. Иккинчи бўлимда ўйинимизни кучайтирдик. Биз Қатарга ғалаба учун келгандик. 90 дақиқа давомида ҳаракат қилдик ва 3 очкога эга бўлдик.

ЎФФ матбуот хизмати