Сауль Альварес икки вазндаги WBA камарларини ўзида сақлаб қолди

Бутунжаҳон бокс ассоциацияси (WBA) Сауль “Канело” Альваресга ўрта ва иккинчи ўрта вазн тоифаларидаги ушбу йўналиш чемпионлик камарларини ўзида сақлаб қолиш учун рухсат берди. 

Ўз вақтида Флойд Мейвезер ҳам 2013-2015 йиллар оралиғида ярим ўрта вазн тоифасида тўртта жанг ўтказган, лекин шунинг баробарида биринчи ўрта вазндаги WBA чемпионлик камарини ўзида сақлаб қолган. WBA ташкилоти айнан Мейвезердан келиб чиқиб, Альваресга ҳам шундай имконият яратиб берди. 

Мексикалик боксчи ўрта вазндаги WBA чемпионлик камарини ўтган йилнинг сентябрь ойида қозоғистонлик Геннадий Головкинни мағлуб этгач қўлга киритганди. Декабрь ойида эса у иккинчи ўрта вазнда Рокки Филдингадан WBA Regular камарини тортиб олди. 

Эслатиб ўтамиз, Сауль Альварес кейинги жангини IBF чемпиони америкалик Дэниел Жейкобсга қарши ўтказади. Бу баҳс бирлаштирувчи чемпионлик жанги мақомида бўлади.