Сергей Ковалёв: “Аброр Турсунпўлатов ёрдамида яна жаҳон чемпиони бўламан”

Хабарингиз бор, Турсунпўлатов Рио-2016 Олимпиадаси чемпиони Фазлиддин Ғоибназаровнинг мураббийи ҳисобланади. Ковалёв кетма-кет сўнгги иккита жангида америкалик Андре Уордга ютқазиб қўйган ва бунинг натижасида жаҳон чемпионлик камарларини бой берганди.

“Украиналик Вячеслав Шабранскига қарши ўтказадиган жангимга тайёргарлик режа асосида давом этяпти. Бу борада менга янги мураббийим Аброр Турсунпўлатов яқиндан ёрдам беряпти. Бу мутахассис билан ҳамкорликда ишлаётганимдан хурсандман.

Биз бир-биримизни жуда яхши тушунамиз, тил борасида ҳам ҳеч қандай муаммо йўқ. Биз биргаликда муваффақиятга эришамиз ва мен яна жаҳон чемпионлик камарларини қўлга кирита оламан”, - деди россиялик собиқ жаҳон чемпиони Сергей Ковалёв.

Эслатиб ўтамиз, Ковалёв 25 ноябрь куни АҚШнинг Нью-Йорк шаҳрида украиналик Вячеслав Шабранскига қарши рингга кўтарилади. Ғоибназаров эса 9 декабрь куни америкалик Стивен Ортизга қарши 8 раундлик жангда рингга чиқади.

Бу жанг Нью-Йорк шаҳридаги дунёга машҳур Madison Square Garden аренасида бўлиб ўтади. Оқшомнинг марказий жангида украиналик жаҳон чемпиони Василий Ломаченко ўз чемпионлик камарини ҳимоя қилади.