Шаҳрам Ғиёсов: "Ушбу ғалаба менга жаҳон чемпионлик камари учун жанг қилиш имконини беради"

"Жанг қизиқарли кечди. Рақибим жуда кучли ва чидамли боксчи экан. Биринчи раундда менга яхшигина қийинчилик туғдирди. Лекин шунга қарамай, мен кейинги раундларда ўз харакатеримни кўрсатишга эришдим. Ўзбекларнинг қандай чидамли, меҳнаткаш эканлигини исботлашга ҳаракат қилдим. Жанг тўлиқ ўн раунд давом этган бўлса, ҳакамлар раундлардан тўққизтасини мени фойдамга ҳисоблашди, рақибим бор-йўғи бир раундда устунликка эришди. Якунда, очколар ҳисобида мен ғалаба қозондим. Ғалабам эвазига WBA Intercontinental камари соҳибига айландим. Бу ғалабам менга жаҳон чемпионлик камари учун жангга чиқишимга имкон беради. Насиб қилса, жаҳон чемпионлиги камарини юртимизга олиб келаман. 

Ғалабага эришиш учун узоқ тайёргарлик кўрдик. АҚШда уч ой давомида тўлиқ куч билан ишлашга ҳаракат қилдим. Мен уч ой давомида икки бор рингга кўтарилдим. Дастлабки жангим Мексикада ўтказилди. Кейинги жангим жуда кучли боксчи билан бўлишини билардик, шунга қарамай биз у билан жанг қилишни истадик. Рақибим менга қадар учта ўн икки раундлик жангда иштирок этиб, уларнинг барчасида ғалаба қозонганди. Унинг кучига шубҳа қилмасдик, лекин мен ўзимга ишондим ва у билан жанг қилишга розилик бердим. 

Мураббийларим, промоутерим менга ишонишлигини айтишди. Мен эплашимни ҳис қилдим. Бу ғалабам катта қадам бўлди. Ушбу натижаларга эришишни орзу қилардим, камдан-кам боксчилар профессионал боксда бундай натижаларни эришади. Боксда доим жароҳатлар, зарбалар бўлади, бундан қочиб бўлмайди. Лекин, меҳнат қилишдан тўхтамасангиз, сиз ният қилган маррангизга эришасиз. 

Ўтган жангда хатоларимни кўрдим, кейинги сафар бу хатоларни қилмасликка ҳаракат қилиб, янада кўпроқ ўз устимда ишлашга ваъда бераман", - деди Шаҳрам Ғиёсов.