Шахмат бўйича "Venkon Cup 2017" мусобақаси старт олди ФОТОГАЛЕРЕЯ

Ўзбекистоннинг турли бурчакларидан келган 100 нафар ўғил ва қизлар мусобақадаги ўз иштирокларини бошлашди.

Ушбу мусобақани "Venkon" компанияси "Sky Chess" шахмат мактаби ёрдамида ташкил этди.

"Venkon Cup" кетма-кет иккинчи йил 16 ёшгача бўлган ўсмирлар учун ўтказилмоқда. Ушбу мусобақани ўтказишдан мақсад, ўсиб келаётган ёш авлод орасида шахмат спорт турига бўлган қизиқишни ўстириш ва ўсмир спортчиларнинг маҳоратларини ошириш ҳисобланади. Мусобақада қатнашган спортчиларда 3, 2 ва 1-разряд талабларини бажариш имконияти бўлади.

Ўтган йил бу мусобақада фақат Тошкент шаҳрида яшовчи ўғил ва қизлар қатнашишган бўлса, бу йил Хоразм, Самарқанд, Сурхондаёр ва бошқа вилоятлардан ҳам спортчилар турнирда ўз омадларини синаб кўришмоқда. Бу йилги мусобақада 100 нафардан ортиқ ёш шахматчилар рўйхатдан ўтишди.

"Venkon Cup 2017" очилиш маросимида ўзбек шахмат юлдузлари – Гулруҳбегим Тохиржонова ва Саидали Юлдашев қатнашишди. Улар ёш иштирокчилар билан бир вақтда бир нечта тахтада ўйин ўтказишди.

"Venkon" компанияси раҳбари Асқар Исмаилов очилиш маросимида ўз фикрларини билдирди: “Барчага маълумки, шахмат – бирданига миянинг иккала томонини ривожлантирадиган ягона спорт тури. Мантиқий ва ижодий. Бола қанчалик эрта шахмат билан шуғулланишни бошласа, ақлий ривожланиш шунча яхши бўлади. Бу мусобақани фақат бир мақсад йўлида ўтказишга қарор қилдик – болалар шахмат ўйнаб ривожланишин. Аслида болаларда ақлий ва ижодий маҳоратни ошириш ота-оналарнинг энг катта совғаси, шахмат эса энг яхши ёрдамчи”.

"Sky Chess" шахмат мактаби асосчиси, Ўзбекстоннинг биринчи аёл гроссмейстери – Нафиса Мўминова: "Шахмат - бу нафақат спорт. Шахмат – бу санъат, илм-фан ва спортнинг йиғиндиси. Ўз тажрибамдан келиб чиқиб шуни айтишим мумкинки, шахмат билан шуғулланган болаларнинг ўқишлари яхшиланади, эслаб қолиш қобилияти кучаяди, тартиб-интизом ҳам яхшиланади. Орзуимиз – ҳар бир мактабга жисмоний тарбия фанига шахматни ҳам қўшиш, унда болаларга шахмат ўйнашни ўргатишади".

Ушбу мусобақа 17 декабрга қадар давом этади.

Қуйидаги ҳавола орқали "Venkon Cup 2017"дан фотогалереяни томоша қилиш мумкин.

>>>ФОТОГАЛЕРЕЯ<<<