Шахмат фестивали ғолиблари аниқланди

Ўзбекистон шахмат федерацияси томонидан ташкил этилган фестивалнинг мазкур босқичида биринчи ва иккинчи ўринни эгаллаган шахматчилар жорий йил декабрь ойида ўтказиладиган ярим финал баҳсларида қатнашиш ҳуқуқига эга бўлади. Ярим финалда 1-2 ўринларни эгаллаган спортчилар эса 2018 йили мамлакатимиз чемпионатида иштирок этади.

Швейцарча тизимда етти турдан иборат мусобақанинг 8 ёшгача ўғил болалар ўртасидаги баҳсларида Жавоҳир Абдуллаев олтин медални қўлга киритди. Саидназар Неъматжонов кумуш, Исломбек Анориддинов бронза медаль билан тақдирланди. Ушбу ёшдаги қизлар баҳсида Мафтуна Одилбекова биринчи, Севинч Давлатова иккинчи, Мубина Рашидова учинчи ўринни эгаллади.

Ўн ёшгача ўғил болалар баҳсида Абубакир Жўраевга тенг келадиган рақиб топилмади. Миразиз Қўзиев иккинчи, Саййид Шамсиддин учинчи бўлди. Қизлар ўртасида Анора Сотимова, Шаҳина Олимова ва Комила Асомиддинова кучли учликдан жой олди.

Ўн икки ёшгача ўғил болалар ўртасида Бобур Бобохўжаев биринчи, Муҳиддин Мадаминов иккинчи ва Умиджон Ҳусанов учинчи ўринни эгаллади.

Ўн тўрт ёшгача ўғил-қизлар баҳсида Хидирдавлат Раимқулов, Малик Бобоқулов, Отабек Абдуқодиров, Зарнигор Абдулатипова, Юлдуз Исроилова ва Мубина Зокирова ғолиб ва совриндорлар қаторидан жой олди.