Шахмат. Гулруҳбегимнинг навбатдаги ишончли ғалабаси

Айлана тарзда ўтказилаётган хотин-қиз шахматчилар мусобақасида икки халқаро гроссмейстер - Гулруҳбегим Тоҳиржонова (2349, чемпионатнинг биринчи рақамли иштирокчиси) ва Сарвиноз Қурбонбоева (2219) ғолиблик учун асосий даъвогар сифатида эътироф этиляпти. 

Олтинчи турда ҳар икки шахматчи ғалабага эришди. Фақат фарқи Қурбонбоева учрашувсиз бир очкони қўлга киритди. Унинг рақибаси Шаҳзода Шермуҳаммадовага техник мағлубият ёзилди. Тоҳиржонова эса қора доналарда ўйнашига қарамай, Райхон Дониёровани таслим этди. 

Бу турда Баҳора Абдусатторова Ирина Геворгян билан, Нилуфар Ёқуббоева Севара Боймуродова билан муросага келди.  Амалдаги мамлакат чемпиони Нодира Нодиржонова оқ доналарда ҳаракат қилиб, Маржона Ўктамовани мағлубиятга учратди. Еттинчи тур олдидан Тоҳиржонова 6 имкониятдан 5,5 очко жамғариб, якка пешқадам бўлиб турибди.