«Шахмат кунлари» фестивалида 6 ёшли болакай халқаро гроссмейстер билан дуранг ўйнади

Гулистон шаҳрида жойлашган «Билимдонлар маскани»да ўтказилган ушбу тадбирда шахмат бўйича Ўзбекистон терма жамоаси бош мураббийи, халқаро гроссмейстер Сайдали Йўлдошев иштирок этди.

Спорт тадбирида шахмат ихлосмандлари таниқли гроссмейстер билан шахмат мусобақасида ўзаро баҳс юритишди. Уч соат давом этган фестиваль якунида шахмат бўйича Ўзбекистон ёшлар терма жамоаси аъзолари, Сардоба туманидан Баҳром Бахриллаев, Бобир Эшбоев, Янгиер шаҳридан Диёрбек Раимжоновлар Сайдали Йўлдошевдан устун келишган бўлса, барча мухлисларнинг олқишига сазовор бўлган гулистонлик 6 ёшли Лазизбек Шавкатов тажрибали устоз мураббийга қарши кечган баҳсда дурангга имзо чекди. Бу эса юртимиздан яна бир ёш истеъдод соҳиби етишиб чиқаётганидан дарак бермоқда.

Мусобақа сўнгида фаол иштирокчиларга Сирдарё вилояти ҳокимлиги томонидан таъсис этилган ташаккурнома ва эсдалик совғалари тақдим этилди.