Шахмат Олимпиадасида фақат беш нафар гроссмейстер 2800+ рейтинг қайд этди. Уларнинг иккиси Ўзбекистон вакили

Ушбу беш нафар шахматчининг икки нафари Ўзбекистон вакиллари. Нодирбек Абдусатторов (2803) ва Жаҳонгир Воҳидов  (2813) мусобақанинг энг яхши ўйинчилари қаторидан жой олган.

Шунингдек, ушбу рўйхатдан англиялик Девид Ҳауелл (2898), ҳиндистонлик Гукеш Доммаражу (2867) ва норвегиялик Магнус Карлсен (2803) каби гроссмейстерлар ўрин олган.

Жаҳонгир Воҳидов ўзи иштирок этган тўртинчи доскада энг яхши натижа билан олтин медални қўлга киритган бўлса, Абдусатторов биринчи доскада фақат Гукешдан ортда қолган ва кумушга эга чиққанди.

Нодирбек Олимпиадада 11 та партия ўтказиб, уларда 8,5 балл тўплади. Воҳидов эса 8 та турда қатнашиб, 6,5 баллга эга бўлди.

Мусобақада жами 1737 нафар шахматчи иштирок этган.

Қайд этиш керак, юқорида келтирилган рейтинг очколари FIDE'нинг жаҳон рейтингидан фарқ қилади. Рейтинг етакчиси Карлсенда 2864 очко бор, Абдусатторов — 2688, Гукеш — 2684, Ҳауелл — 2650, Воҳидов — 2564.

Эслатиб ўтамиз, Ўзбекистон эркаклар терма жамоаси Олимпиадада бирорта турда мағлубиятга учрамай, чемпионликни қўлга киритганди.