Шахмат. Тоҳиржонова - муддатидан аввал Ўзбекистон чемпиони!

Айлана тарзда ўтказилаётган хотин-қиз шахматчилар мусобақасида икки халқаро гроссмейстер - Гулруҳбегим Тоҳиржонова (2349, чемпионатнинг биринчи рақамли иштирокчиси) ва Сарвиноз Қурбонбоева (2219) ғолиблик учун асосий даъвогар сифатида эътироф этиляпти. 

Ўзбекистон чемпиони номи мусобақа якунланишига бир тур қолганида аниқ бўлди. Саккизинчи партияда Тоҳиржонова қора доналарда ўйнашига қарамай, ёшлар ўртасида Осиё чемпиони Баҳора Абдусатторовани мағлубиятга учратди ва бу билан муддатидан аввал мамлакат чемпионига айланди. 

Гулруҳбегим 8та учрашувдан 7тасида ғалабага эришди. Фақат Ирина Геворгян билан дуранг қайд этди. Учинчи ўринга тушиб қолган Сарвиноз Қурбонбоева қора доналарда ҳаракат қилиб, Нилуфар Ёқуббоева билан муросага келди. 

Эндиликда собиқ мамлакат чемпионига айланган Нодира Нодиржонова Ирина Геворгянни мағлубиятга учратди. Севара Боймуродова Маржона Ўктамовага ютқазиб қўйди. Сўнгги тур олдидан Тоҳиржонова 8 имкониятдан 7,5 очко жамғарган. Кечаги ғалабадан сўнг Нодира Нодижонова 6 очко билан иккинчи ўринга кўтарилиб олди. Қурбонбоева ҳисобида 5,5 очко бор.