Шахмат. “Тошкент кузи” турнири якунланди

Республика ихтисослашган болалар ва ўсмирлар шахмат мактабида анъанавий “Тошкент кузи” турнири ниҳоясига етди.

Истеъдоди ва рейтинг кўрсаткичига кўра, “А” ва “Б” гуруҳларида дона сурган шахматчилар 9 кун давомида беллашди. “А” гуруҳида қорақалпоғистонлик Раҳматжон Раҳимов 9 имкониятдан 8,5 очко жамғариб, шоҳсупанинг энг юқори поғонасидан жой олди. Тошкент вилояти шарафини ҳимоя қилган Олмос Раҳматуллаев 7 очко жамғариб, 2-ўринни эгаллади. 3-ўринга пойтахтлик Ҳадиятулло Муҳамедов сазовор бўлди.

14 ёшгача бўлган ўғил-қизлар қатнашган “Б” гуруҳида 1-ўринни Акобир Жўраев (Қашқадарё, 7,5 очко) эгаллади. Кейинги ўринларни Жаҳонгир Комилов (Тошкент ш., 7,5 очко) ва Ҳабибуллоҳ Абдуллаев (Тошкент ш.,7 очко) банд этди.

Ғолиб ва совриндорлар диплом ҳамда эсдалик совғалари билан тақдирланди.