Шоҳжаҳон рақиб нима учун ўзгарганига изоҳ берди

Чарм қўлқоп устамиз сайтимизга берган интервьюсида нима учун ушбу кутилмаган ўзгариш амалга ошганига изоҳ берди.

- Воқеалар ривожи бундай кескин ўзгариб кетишини кутмагандик. Менежер ва промоутерларим учун ҳам бу кутилмаган сюрприз бўлди. Афсуски, жангга оз муддат қолганида рақибим бетоб бўлиб қолди. 

Натижада Даниелито Зоррилланинг жамоаси Москвага келмасликка қарор қилди. Биз зудлик билан бошқа рақиб изладик ва Максим Чурбанов вариантида тўхталдик. Бундай қисқа вақтда кучли рақиб топишнинг имкони йўқ эди. 

Энг ёмони шундаки, жанг учун чиқарилган чипталар аллақачон сотиб бўлинганди. Рингга чиқмаслигимнинг имкони йўқ эди. Насиб қилса, эртага чиройли ғалабам билан мухлисларни хушнуд этаман. Бўлиб ўтган кўнгилсиз ҳолат учун барчадан узр сўрайман, - деди Эргашев. 

Эслатиб ўтамиз, Шоҳжаҳоннинг янги рақиби 32 ёшли Максим Чурбанов россиялик боксчи бўлиб, фаолияти давомида жами 13 та жанг ўтказган. Ҳисобида 8 ғалаба, 4 мағлубият ва бир дуранг бор. Бир маротаба нокаутга учраган.