Спорт курашлари. Икки вакилимиз олтин, яна иккиси бронза учун курашади

Ушбу мусобақа эркин, юнон-рим ва аёллар кураши вакиллари учун жорий 2020 йил ҳисобидан ўрин олган илк рейтинг турнири ҳисобланади. Бугун юнон-рим кураши усталари медаллар ва рейтирнг очколари учун баҳсларни бошлаб беришди. 

Қувонарлиси, ҳамюртларимизнинг тўрт нафари эртага медаллар учун кечадиган беллашувларда гиламга чиқиш имкониятини қўлга киритишди. -60 кг вазн тоифасида юртимиз шарафини ҳимоя қилаётган Исломжон Баҳромов финалга йўл олди. У чорак финалда жамоадоши Феруз Тўхтаевни қийинчилик билан 8:7 ҳисобида енгди. Ярим финалда ҳиндистонлик Сачин Ранага ҳеч қандай имконият қолдирмади - 9:0. Унинг эртанги олтин медаль учун беллашувдаги рақиби хитойлик Сайлике Валихан бўлади. Феруз Тўхтаев эса айнан Ранага қарши бронза медали учун курашади.  

-67 кг вазнда гиламга чиқаётган юртдошимиз Маҳмуд Бахшиллоев ҳам финал йўлланмасига эга бўлди. Маҳмуд чорак финада италиялик Рубен Марвайсни 8:0, ярим финалда венесуэлалик Хавьер Паленсия Пуэнтесни 8:0 ҳисобида таслим этди. Энди у эртага олтин медаль учун кечадиган учрашувда мисрлик Муҳаммад Эл Сайид Абуҳалимага қарши баҳс олиб боради.       

Энг оғир (-130 кг) вазндаги курашчимиз Мўминжон Абдуллаев биринчи босқичда италиялик Лука Годинони 8:0 ҳисобида енгди. Лекин 1/4 финалда мисрлик Абдулатиф Муҳаммад Аҳмадга 4:6 ҳисобида ютқазиб қўйди. Ўтиш баҳсида финляндиялик Йоханнес Костадан устун келган Мўминжон эртага бронза медали учун гиламга чиқади. Унинг рақиби норвегиялик Оскар Марвик бўлади.  

Ўзбекистон спорт курашлари ассоциацияси матбуот хизмати