24 май 11:32
Янгиликлар

Теннис

Стефанос Циципас Лионни забт этди

Франциянинг Лион шаҳрида ўтказилган теннис бўйича нуфузли ATP турнири грециялик Стефанос Циципаснинг ғалабаси билан якунланди.

Сайёрамизнинг бешинчи ракеткаси Open Parc d'Auvergne-Rhone-Alpes-Lyon бош соврини учун кечган ҳал қилувчи финал учрашувида рейтингнинг 49-поғонасидан жой олган британиялик Кэмерон Норрига қарши кортга чиқди ва икки сетда ҳам бир хил ҳисобда зафар қучди - 6/3, 6/3.

Бир соату 9 дақиқа давом этган баҳсда Стефанос 7 та эйс, 3 та брейкни амалга оширди. Теннисчиларнинг ўзаро учрашувларидаги ҳисоб мувозанати тикланди - 1:1.

Лиондаги муваффақиятли иштирок Циципасга 41,145 евро мукофот пули ҳамда 250 рейтинг очкосини тақдим этди. Бу унинг мавсумдаги иккинчи, фаолиятидаги еттинчи соврини бўлди. Норри эса Франциядаги иштирокидан 29,500 евро ва 150 очко ишлаб олди.