Суперлига. Бугун "Локомотив" ўз уйида, "Пахтакор" сафарда ўйнайди

"Локомотив" охирги 4та турда ғалабага эришган Суперлигадаги ягона клуб бўлди. "Қизилқум" эса учта турдан буён ғалаба нималигини билмай келмоқда.

"Темирйўлчилар" 5та турда рақиб дарвозасига энг кўп гол уришди - 10та. "Қизилқум" Ўзбекистон чемпионатида бу рақибга қарши ўтган сўнгги 10та ўйиннинг ҳеч бирида ғалаба қозона олмаган.

"Локомотив" ўз уйида "Қизилқум"га фақат икки марта ютқазган холос (2005 ва 2012 йил).

"Металлург" бу мавсум Бекободда иккита ўйин ўтказди ва ҳар иккаласида ғолиб бўлди. "Қўқон-1912" чемпионатдаги илк ғалабасини ўтган турда сафарда қўлга киритди.

Бу жамоаларнинг Бекободда ўтган 9та учрашувнинг 7тасида "Металлург" ғолиб бўлган. Бир марта дуранг қайд этилган ва бир марта "Қўқон-1912" сафардан ғалаба билан қайтган (2002 йил).

Ўтган йил "Қўқон-1912"да ўйнаган Баҳодир Пардаев айни пайтда "Металлург" шарафни ҳимоя қилмоқда. 2018 йил "Металлург" аъзоси бўлган Жавоҳир Эсонқулов ҳозирда қўқонликлар таркибида.

"Сўғдиёна" ўтган янги бош мураббий Улуғбек Бақоев бошчилигидаги ғалабага эришди. "Пахтакор" эса чемпионатни мағлубиятсиз давом эттираётган ягона клуб бўлиб турибди.

"Пахтакор" бу йил сафардаги икки учрашувда мағлуб бўлгани йўқ. "Сўғдиёна" эса ўз уйида 2 ғалаба ва 1 мағлубият қайд этди.

"Сўғдиёна" Жиззахда "Пахтакор"ни сўнгги бор 1999 йилги мавсумда мағлуб этган экан. Шундан кейин ўз майдонидаги 15та ўйиннинг ҳеч бирида "Сўғдиёна" "шерлар"дан устун кела олмаган.

"Пахтакор" Ўзбекистон чемпионатида хоҳ уйда, хоҳ сафарда бўлсин қаторасига 11та ўйиндан буён "Сўғдиёна"ни мағлуб этиб келмоқда.