Тарихда илк бор Японияда ўтадиган Гран-при бошланишига бир ҳафта қолди

Тарихда илк бор кунчиқар юрт таэквондо бўйича Гран-при мезбони бўлади. 

Эътиборлиси бўлажак Гран-при 2020 йил Олимпиада ўйинлари таэквондо мусобақалари ўтказиладиган шаҳарда ўтказилади. Чибадаги "Chiba Port Arena"да ўтадиган жанглар шиддатли бўлиши аниқ, зеро ушбу Гран-при орқали спортчилар Олимпиада рейтинги учун қимматли бўлган очколарни қўлга киритишлари мумкин. 

Жаҳоннинг энг кучли таэквондочилари 8та вазн тоифасида (4та аёллар, 4та эркаклар) кураш олиб боришади. 2019 йил июль ойида эълон қилинган Олимпиада рейтинги асосида ҳар бир вазн тоифасида энг юқоридаги 31 нафардан спортчи мазкур Гран-прига таклиф этилган. 

"2020 йилги Олимпиада ўйинларига жуда оз вақт қолди. Шу боисдан ҳам тарихда илк бор Японияда ташкил этиладиган Жаҳон Гран-приси ажойиб ўтишига шубҳа йўқ. Бундан ташқари спортчилар, мураббийлар ва расмий шахслар кейинги йил ёзги Олимпиада ўйинларининг таэквондо мусобақалари бўладиган шаҳар билан яқиндан танишиш имконияти бўлади", - деди Бутунжаҳон таэквондо Федерацияси президенти Чунгвон Чой.

Маълумот учун, 2020 йилги ёзги Олимпиада ўйинларининг таэквондо бўйича мусобақалари Чиба шаҳридаги "Makuhari Messe" спорт залида бўлиб ўтади. Бундан ташқари тарихда илк бор таэквондо мусобақалари Олимпиада ўйинларининг бошида (25-28 июль) ўтказилади. 

Эслатиб ўтамиз, Чибадаги Жаҳон Гран-присида ўзбекистонлик тўрт нафар таэквондочи Никита Рафалович, Нигора Турсунқулова, Светлана Осипова ҳамда Улуғбек Рашитов иштирок этишади.