Tashkent Open XII. Ниғматов бир дуранг ва мағлубият қайд этди

Мусобақада 12 мамлакатдан келган шахматчилар ғолиблик йўлида ўзаро рақобатлашишяпти. Ўз тарихида ўн иккинчи бор ўтказилаётган халқаро турнирнинг соврин жамғармаси 20 000 АҚШ долларини ташкил қилади. Ғолиб шахматчи 3 000 долларга эга бўлади. 

Беларуслик халқаро гроссмейстер Кирил Ступак (2556) турнирнинг биринчи рақамли шахматчиси ҳисобланади. Кеча у куннинг иккинчи ярмида ўтказилган еттинчи турда ёш ҳамюртимиз Нодирбек Ёқуббоевни мағлубиятга учратди ва қўшимча кўрсаткичларга кшра 6 очко билан пешқадам бўлиб олди.

Бешинчи турда айнан Ступакни таслим этиб, биринчи ўринга кўтарилиб олган ёш шахматчимиз Ортиқ Ниғматов эса кетма-кет иккита турда очко йўқотди ва тўртинчи ўринга пастлади. У кеча қора доналар ҳаракат қилиб, россиялик халқаро гроссмейстер Василий Папин билан муросага келди. 

Яна бир ҳамюртимиз Саидакбар Сайидалиев қора доналарда ўйнаб, испаниялик халқаро гроссмейстер Олег Корнеев билан дурангга эришди. Бугун саккизинчи турда Ниғматов россиялик халқаро гроссмейстер Евгений Левинга қарши оқ доналарда ҳаракат қилади.