Тез орада Бухоро тарихий марказида шахмат майдончаси барпо этилади

Ўзбекистон Республикаси Бош вазири ўринбосари – Туризм ва спорт вазири Азиз Абдухакимовнинг жорий апрель ойида Бухоро вилоятига амалга оширган ташрифи давомида Бухоро шаҳрининг тарихий қисмида жойлашган “Лаби Ҳовуз” ансамбли ҳудудига яқин жойда, Нодир Девонбеги хонақоси ва Бадриддин карвонаройи орасидаги бўш ҳудудда ёғочдан миллий услубда ишланган енгил конструкцияли катта шахмат майдончасини барпо этиш ташаббуси илгари сурилган эди.

Бу лойиҳадан кўзланган асосий мақсад, ҳудудда сайр қилувчиларнинг ҳам маданий, ҳам интеллектуал ҳордиқ чиқаришлари ҳамда ёшларни шахмат спортига бўлган қизиқишини оширишдан иборат.

Шахмат майдончасининг лойиҳаси ташаббускор тадбиркор томонидан вилоят маданий мерос бошқармаси билан ҳамкорликда ишлаб чиқилди ва ҳозирда мазкур лойиҳани Маданий мерос департаментининг Илмий-эксперт Кенгаши билан белгилган тартибда келишиш ишлари олиб борилмоқда.

Умид қиламизки, тез орада қадим Бухорога ташриф буюрган сайёҳлар нафақат тарихий обидаларимизнинг гўзаллиги ва маҳобатидан завқланиши, балки шахмат ўйнаб ўз тафаккурини янада бойитиши мумкин бўлади.