“Тошкент ёзи-2016”да ғолиб ва совриндорлар маълум

Ўзбекистон шахмат федерацияси мезбонлик қилган мусобақа ҳозиргина ўз якунига етди. Швейцарча тизимда ўтказилиб, 9та турдан иборат бўлган мусобақада мамлакатимиз шахматчиларидан ташқари АҚШ ва Россиядан келган спортчилар ҳам ўз имкониятларини синаб кўришди.

Халқаро очиқ турнир икки гуруҳда ташкил этилди. “А” гуруҳида халқаро рейтингга эга бўлган 48 нафар шахматчи қатнашди. Мусобақа якунига кўра, 7,5 очко жамғарган хоразмлик Мақсад Сафаев ғолибликни қўлга киритди. Иккинчи ўринни 7 очко билан россиялик Руслан Салаев эгаллаган бўлса, кучли учликка айнан шунча очко жамғарган сурхондарёлик Иномжон Шоймуродов якун ясади.

Рейтинги нисбатан паст бўлган шахматчилар “В” гуруҳида дона суришди. Жами 101 нафар иштирокчи жам бўлган ушбу гуруҳда 8 очко билан Тошкент вилояти вакили Мамаражаб Мамарасулов зафар қучди. Иккинчи ўринни пойтахт вилояти спортчиси Сирожиддин Махаматов 7,5 очко билан банд этди. Пойтахтлик Камронбек Қорабоев эса 7 очко билан учинчи ўринни эгаллади.